Rådgjevar

Vil du jobbe innan Oppfølgingstenesta?

Rettleiingstenesta er ei brukarnær teneste i vidaregåande opplæring i Vestland fylkeskommune. Hovudoppgåva til tenesta er å leggje til rette for at flest mogleg ungdomar og vaksne fullfører vidaregåande opplæring. Vi har eit tett samarbeid med skulane, kommunane, NAV og andre aktuelle instansar. Vi skal bidra til lærelyst og fremje læring for elevar og lærlingar. Dette gjer vi gjennom å følgje opp elevar, lærlingar, støtte ungdom utanfor opplæring, rettleie vaksne og yte pedagogisk-psykologiske tenester. Tenesta består av eit tverrfagleg team innan fagfelta pedagogisk-psykologis teneste (PPT), oppfølgingstenesta (OT), opplæring i bedrift (OIB) og vidaregåande opplæring for vaksne.

Rettleiingstenesta Bergen sør dekkjer bydelane Fana og Ytrebygda og kommunane Bjørnafjorden og Austevoll. Vi har kontorstad på Nesttun.

Rettleiingstenesta Bergen sør har ledig eit 1 års vikariat som rådgjevar i Oppfølgingstenesta. Vi ønskjer at den som blir tilsett, kan starte i stillinga snarast råd.

Arbeidsoppgåver

Oppfølgingstenesta arbeider for at ungdom mellom 15 og 24 år, som står utanfor vidaregåande opplæring, skal få rettleiing om opplæring, arbeid, aktivitet eller andre kompetansehevande tiltak.

• Ta kontakt med og hjelpe ungdom tilbake i vidaregåande opplæring, slik at dei kan fullføre og oppnå studiekompetanse, yrkeskompetanse eller grunnkompetanse
• Gi oppfølging og rettleiing til ungdom som høyrer til målgruppa
• Kartleggje ressursane til ungdomane og fokusere på moglegheitar
• Halde oversikt over ungdomane i målgruppa
• Formidle tilbod om opplæring, arbeid eller kompetansefremjande tiltak
• Rettleie skular i arbeidet med å forebyggje avbrot i opplæringa, og delta i ressursteam og avklaringssamtalar
• Sikre og samordne tverretatleg samarbeid mellom kommunale, fylkeskommunale og statlege instansar som har eit felles ansvar for målgruppa

Arbeidsoppgåvene og arbeidsforma i tenesta krev stor grad av sjølvstende, og du må trivast med ein hektisk kvardag.

Kvalifikasjonar

Vi søkjer deg som har:

• Utdanning frå universitet eller høgskule i relevante fag
• Erfaring med rettleiing av ungdom i oppfølgingstenesta si målgruppe
• Rettleiingskompetanse og erfaring med karriererettleiing
• Kunnskap om lovverk, regelverk og offentleg forvaltning som regulerer vidaregåande opplæring
• Kunnskap om alternative opplæringsløp og opplæringsmoglegheiter utanfor ordinær vidaregåande opplæring
• Gode digitale ferdigheiter.
• Erfaring med tverretatleg samarbeid
• God munnleg og skriftleg framstillingsevne på norsk
• Førarkort kl. B

Personlege eigenskapar

Vi søkjer etter deg som:

• Er fleksibel, inkluderande og har evne til å byggje gode relasjonar til ungdom og vaksne
• Set ungdommane si meistring, læring og utvikling i sentrum for arbeidet
• Er løysingsorientert og strukturert
• Har gode samarbeidsevner, samstundes som du kan arbeide sjølvstendig og målretta

Personlege eigenskapar vert vektlagt.

Vi tilbyr

• Gjevande arbeid med ungdom og vaksne innan vidaregåande opplæring i eit fagmiljø med høg kompetanse
• Vi er opptekne av trivsel på arbeidsplassen og legg vekt på eit godt og uformelt arbeidsmiljø. Slik gjer vi kvarandre gode og skapar engasjement
• Løn etter avtale
• Gode pensjons- og forsikringsvilkår
• Stillingsnemning konsulent/rådgjevar/seniorrådgivar etter kvalifikasjonar og erfaring

KontaktinformasjonÅse Fretheim, leiar, +47 92263333 ArbeidsstadØstre Nesttunvegen 20 5221 Nesttun Nøkkelinformasjon:Arbeidsgivar: Vestland fylkeskommune

Referansenr.: 5195775270 Stillingsprosent: 100% Vikar Søknadsfrist: 30.10.2026

Om arbeidsgiveren:

Vestland fylkeskommune har ansvar for å utvikle Vestland fylke og å yte viktige tenester for samfunnet. Vi gir vidaregåande opplæring, tannhelsetenester og kollektivtransport til innbyggjarane i fylket. Vi har ansvar for vegsamband og legg til rette for næringsutvikling, fritidsopplevingar, kulturliv og inkludering. Klima og miljø er premiss for samfunnsutviklinga og som verdiskapingsfylke er Vestland ein nasjonal pådrivar for eit desentralisert Noreg.

Vi skal vere ein trygg og inkluderande arbeidsplass for alle, uavhengig av kjønn, alder, etnisk bakgrunn, religion, livssyn, funksjonsevne, seksuell orientering og kjønnsidentitet. Hos oss jobbar vi aktivt med mangfald, inkludering og likestilling. Mangfald bidrar til auka innovasjon, berekraft, effektivitet, læring og trivsel. Vi vil at dei som jobbar hos oss skal spegle samfunnet i Vestland.

Vi gjer merksam på at i følgje offentleglova § 25, 2. ledd, kan opplysningar om søkjaren bli offentleggjort sjølv om du har oppmoda om å ikkje bli ført på offentleg søkjarliste. Dersom du har bedt om unntak frå offentleg søkjarliste vil du alltid bli varsla før søkjarlista blir offentleggjort.

Alle nye tilsetjingar blir gjort med ei prøvetid på 6 månader. Administrasjonsmålet vårt er nynorsk.